íslenskir stólar

Á dögunum færði Hjalti Geir Kristjánsson húsgagnahönnuður Hönnunarsafninu stól að gjöf. Um er að ræða borðstofustól sem Hjalti hannaði árið 1963 og var framleiddur og seldur um árabil hjá Kristjáni Siggeirssyni hf. Eintakið sem Hjalti færði safninu er með bólstraðri leðursetu og grindin úr palisander. Stóllinn er glæsileg viðbót í stólasafn Hönnunarsafnsins en fyrir á safnið fimm mismunandi tegundir af stólum eftir Hjalta Geir sem finna má víða í opinberum byggingum eða á heimilum fólks. Þetta eru hægindastólar, borðstofustólar og fundarstólar. Nýverið var borðstofustóllinn frá 1963 endurframleiddur í 170 eintökum úr eik og tekki fyrir Canopy Hótel Hilton á Hljómalindarreitnum í Reykjavík. Stóllinn er fágaður og sómir sér vel og hann má finna á sýningu safnsins Stóll, sem var opnuð 18. mars síðastliðinni.

Lesa áfram

Grafíski hönnuðurinn Elsa Nielsen hefur getið sér gott orð fyrir teikningar sínar #einádag sem hún hefur birt á Instagrammi reglulega.

Í tilefni af HönnunarMars 2017 leitaði Hönnunarsafnið eftir samstarfi við Elsu um að teikna hluti úr safneign safnsins. Stólasafnið varð fyrir valinu enda fjölbreyttur safnkostur og nokkuð dæmigerður í öllum hönnunarsöfnum.

Elsa hóf leikinn á Safnanótt, þann 3. febrúar síðastliðinn og teiknar einn stól á dag í 28 daga eftir jafnmarga íslenska hönnuði. Stólarnir verða til sýnis á sýningunni Stóll og frumteikningar Elsu einnig.

Í safnbúð verður til sölu veggspjald með stólunum 28 eftir Elsu og úrval gjafakorta með mynd af íslenskum stól. Ágóði af sölunni rennur til uppbyggingar safnkosts safnsins, sem felst í að kaupa íslenska hönnun af íslenskum hönnuðum.

Lesa áfram
Subscribe to RSS - íslenskir stólar