Í nóvember og desember hefur  Hönnunarsafn Íslands boðið upp á jólasmiðjur fyrir nemendur leik-og grunnskóla í tengslum við jólasýningu safnsins Hvít jól. Skólabörnin hafa búið til kramarhús, músastiga,  klippt jóladúka og búið til jólaskraut af ýmsu tagi. Börnin hafa ekki látið sitt eftir liggja sungið jólalög og  skreytt jólatré safnsins með litríku jólaskrauti.
 Jólasmiðjan hefur farið vel af stað og skín ákafinn og tilhlökkun fyrir jólunum úr hverju andliti hver hlutur hefur sitt sérkenni og er búin til af alúð þar sem einfaldleikinn og smáatriðin spila saman og mynda hlut sem er fallegt að skreyta með og gaman að snerta, eiga eða gefa.
Á myndunum má sjá áhugasama nemendur Hofsstaðaskóla og Flataskóla klippa út kramarhús og nemendur Leikskólans Bæjarbóls skreyta jólatré safnsins.


Á sýningunni Hvít jól má sjá stóla eftir heimsþekkta hönnuði eins og Harri Koskinen,  Poul Kjærholm og Peter Opsvik, uppdekkað hátíðarborð með borðbúnaði eftir þekkt fyrirtæki sem starfað hafa við framleiðslu borðbúnaðar í tugi ára, fyrirtækið Arabía, Royal Copenhagen, Stavangerflint og fleiri.  Allt er þetta norræn hönnun og margir hlutir sýningarinnar kunnuglegir. Ólöf Jakobína Ernudóttir sýningarstjóri, sýningarinnar talar um hátíðarborðið, sem borð minninganna sem leiðir hugann að endurmati og endurnýtingu.


Í safnið er tekið á móti hópum í jólasmiðjuna og haldnar leiðsagnir um sýningarnar.
Vinsamlegast hafið samband við Árdísi Olgeirsdóttur, ardisol@gardabaer.is fyrir nánari upplýsingar og tímapantanir.