Sýningin Óvænt kynni- Innreið nútímans í íslenska hönnun í Hönnunarsafni Íslands verður framlengd til 5. janúar 2014.

Sýningin endurspeglar þann hluta íslenskrar hönnunarsögu sem hefst með innreið módernismans í íslenska híbýlamenningu upp úr 1930 og áhrifa hans fram yfir 1980. Á sýningunni eru munir úr safneign Hönnunarsafns Íslands og annarra menningarminjasafna en einnig koma til óvænt kynni við hluti sem varðveist hafa í heimahúsum.
Á sýningunni má líta vel þekkta hönnunargripi, sem öðlast hafa sess með þjóðinni sem tímamótaverk.  Einnig eru þar óvæntir hlutir sem greina má jafnt í verkum nafnlausra smiða sem og framsækinna húsgagna- og textílhönnuða á síðustu öld.  Staldrað er við gripi sem varðað hafa veginn og minna jafnframt á að samtímahönnun bergmálar oft það sem á undan kom og að „margt kann öðru líkt að vera“. Skoðuð eru mörk hefða og nútíma í húsgagnagerð, tilkoma nýrra efna líkt og krossviðs og krómaðs stáls, notkun járns og nýstárlegra þráða. Hægt er að sjá verk fyrstu íslensku húsgagnateiknaranna, en einnig einföld húsgögn eftir húsgagnaarkitekta sjötta og sjöunda áratugarins, klædd íslenskum áklæðum. Vakin er athygli á merku brautryðjendastarfi íslenskra kvenna við nútíma áklæða- og teppagerð eftir 1945 og nýbreytni tauþrykksins um 25 árum síðar.

Sýningarstjórar eru Dr. Arndís S. Árnadóttir  og Elísabet V. Ingvarsdóttir hönnunarfræðingur.


Safnið er opið alla daga frá kl. 12-17, lokað mánudaga.