Við bjóðum upp á glænýja sýningu með völdum munum úr safnkosti safnsins. Á 17. júní er ókeypis aðgangur í safnið og opið frá 12-17. Við hvetjum alla til að nýta daginn og gera sér ferð í safnið og skoða úrvalsmuni úr safneigninni sem varpa ágætu ljósi á þá breidd sem einkennir söfnunarsvið Hönnunarsafnsins. Á sýningunni má skoða módel af byggingu Högnu Sigurðardóttur að Bakkaflöt 1 í Garðabæ, en einnig Appollo stól Gunnars Magnússonar og fatnað íslenskra tískuhönnuða og listamanna. Nokkrir lampar eru til sýnis, meðal annars Heklulampi þeirra Péturs B. Lútherssonar og Jóns Ólafssonar en Heklulampinn var framleiddur í mörg ár í Danmörku og seldur víða. Meirihluti safneignar safnsins eru gjafir og á sýningunni geta gestir lesið sér til gagns og fróðleiks ýmsa texta um það af hverju ákveðnum hlutum er safnað. Frásagnir hönnuða má einnig finna og í aftara rými sýningarinnar höfum við sett ,,safnið upp á röngunni". Þar vinnum við á virkum dögum við að skrá og ljósmynda muni og þannig geta gestir skyggnst inn fyrir þröskuldinn að svæði sem sjaldnast snýr að gestum. Sýningin Geymilegir hlutir er vísir að fastri sýningu safnsins, en við munum skipta út munum jafnt og þétt á næstu mánuðum. Sýningin verður síbreytileg