Kynning á rannsóknarskýrslu um íslensku lopapeysuna.

fimmtudagur, 30 apríl, 2015 - 17:00 - 18:00
Kynning á rannsóknarskýrslu um íslensku lopapeysuna.

Ásdís Jóelsdóttir lektor kynnir helstu niðurstöður rannsóknar sinnar um uppruna íslensku lopapeysunnar í húsakynnum Hönnunarsafns Íslands við Garðatorg 1 í Garðabæ fimmtudaginn 30. aprílkl. 17:00

Haustið 2014 hófst rannsókn á uppruna, hönnun og þróun íslensku lopapeysunnar en verkefnið var samstarfsverkefni þriggja safna; Gljúfrasteins – húss skáldsins, Hönnunarsafns Íslands og Heimilisiðnaðarsafnsins á Blönduósi.

Uppruni, hönnun og þróun lopapeysunnar er mikilvægur hluti af textílsögu þjóðarinnar en hún er einnig hluti af sögu íslenskra karla og kvenna sem með hugverki sínu lögðu grunn að einni mikilvægustu útflutningsvöru Íslendinga fyrr og síðar. Lopapeysan er þannig mikilvægur hluti af tæknibyltingu og útflutnings- og hönnunarsögu þjóðarinnar og hefur því ekki að ástæðulausu orðið stór þáttur í þjóðarímynd um Íslendinga.

Í skýrslu Ásdísar má finna upplýsingar um prjón og ullarvinnslu í sögulegu samhengi og þær aðstæður hérlendis sem rekja má upphaf lopapeysunnar til og þá þróun sem greina má allt frá upphafsárum Lýðveldisins. Rakin eru þau atriði sem gerðu lopapeysuna að séríslenskri frumhönnun sem þróuð var í samvinnu og með þátttöku margra einstaklinga og áhrifavalda þar sem samfélags- og tæknilegir þættir og framboð og eftirspurn skiptu sköpum.

Rannsóknin var unnin af Ásdísi Jóelsdóttur lektor við Menntavísindasvið Háskóla Íslands.

 

Skýrslan er gefin út á rafrænu formi og er aðgengileg á heimasíðum safnanna: www.gljufrasteinn.is, www.textile.is og www.honnunarsafn.is

Rannsóknin hlaut styrk úr Safnasjóði.

Nánari upplýsingar um  efni skýrslunnar má nálgast hjá Ásdísi Jóelsdóttur : aoj@hi.is eða í síma 8478760 

Mynd sem fylgir tilkynningu er tekin af Andrési Kolbeinssyni. Myndin er varðveitt hjá Ljósmyndasafni Reykjavíkur (AKO 003 001 2-2).